2 ka puya gipanglabay sa basurahan gihulmigas

CEBU, Philippines - Duha ka puya ang napalgan nga gipanglabay lang sa lainlaing lugar dinhi sa dakbayan sa Sugbo ug didto usab sa Pinamungajan.

Ang usa nakit-an sa basurahan didto sa Barangay Inayawan, dakbayan sa Sugbo ug ang laing puya nga patay na didto usab nakit-an nga gilabay sa likod sa merkado sa Pinamungajan.

Mga sakop sa Homicide Section sa Cebu City Police Office miadto sa Inayawan Sanitary Landfill human sila makadawat og inpormasyon nga adunay puya nga gilabay sa mao  nga dapit.

Ang 19-anyos nga si Diane Manayon, usa ka basurero maoy una nga nakakita sa fetus nga gisulod og karton.

Matud ni Manayon nga nagtuo lang siya sa sinugdanan nga usa ka patay nga hayop ang sulod sa karton apan diha’ng iyang gibuksan nasuta nga patay nga puya ang diha sa sulod.

Si homicide investigator Ruth Violango mibana-bana nga tulo ka bulan na ang pangedaron sa maong fetus ug gilabay kini sa iyang inahan  ug gituohan nga giapil kini og labay uban sa mga basura gikan sa wala masayri nga dapit.

Matud ni Violango nga lisod mahibaw-an kun kinsa ang inahan sa fetus nga naglabay sa iyang anak.

Didto sa Pinamungajan, nakurat na lang ang katawhan diha nga napalgan luyo sa merkado sa Barangay Tutay ang usa usab ka fetus nga gibana- bana nga duha pa ka buwan sa tiyan sa inahan.

Si PO1 Ronelo Lawas sa Pinamungajan Police Station miingon nga gituohan nga usa ka adlaw na nga gilabay ang maong fetus kay nagkadugta na ang iyang kahimtang ug gihulmigas. (BANAT NEWS)