Korean nga “mipatay” sa asawa ug ugangan mi-deny

CEBU, Philippines - Kusganong gihimakak sa Koreano nga suspek sa pagpatay sa iyang asawa ug mga ugangan ang mga pasangil batok kaniya. Samtang gi-cremate na kagahapon sa buntag ang patay’ng lawas mga biktima sa usa ka punirarya aron ipadala kini balik sa Korea.

Sa pakighinabi sa Banat News sa suspek nga si Kim Se Wong, nangangkon siya nga  ala-una sa kaadlawon niadtong Mayo 22, miuna na siya og katulog sa ilang kwarto human sila nag-inom sa iyang asawa.

Nianang pagka-alas singko sa hapon nanaug siya sa silong ug iyang nakita nga pulos na nagbuy-od nga wala nay kinabuhi ang iyang asawa ug mga ugangan, tungod niini misaka siya sa ikaduhang andana ug nakahunahuna nga maghunos sa iyang kinabuhi pinaagi sa paglaslas sa iyang duha ka pulso.

Nagduda si Wong nga dunay laing tawo mipatay sa mga biktima ug wala sa iyang hunahuna ang pagpatay sa iyang kabanay diha sa ilang restaurant sa Sitio Bagong Bayan, Barangay Marigondon dakbayan sa Lapu-Lapu.

Matud pa ni PO3 Lydo Pinos imbestigador sa maong kaso, nagdumili paghatag og pamahayag ang igsuon sa asawa sa suspek nga si An Tae Joo gumikan kay kagahapon usab gi-cremate ang patay’ng lawas ni Young Mi An ug mga ginikanan nila nga si Ho An ug Kim Soon Ok.

Apan base sa nakuhang impormasyon ni Pinos, giingon nga kanunay insultohon sa mga ugangan si Wong ug gituohan nga napuno na kini maong nabuhat niini ang maong krimen.

Nadiskubrehan usab ni Pinos nga si Wong nakumbikto na sa kasong estafa sa sala ni Cebu City RTC Branch 18 ni Judge Gilbert Moises ug wanted kini sukad migawas ang sentensiya niadtong Septiyembre 15, 2011. Si Wong ipresentar karong adlawa ngadto sa sala ni Moises.

Matud ni PO3 Pinos mabilanggo gihapon si Wong sa iyang kasong estafa samtang gihikay pa nila ang kasong "multiple homicide" batok niini. (BANAT NEWS)