Drayber sa Mandaue padayon’g nagpakilooy

CEBU, Philippines - Wala gihapon kawad-i  og paglaum ang mga operators ug drayber sa mga passenger jeepneys sa Mandaue nga nagdala sa rota nga 21B ug 22B nga matugotan ra sila pagsulod pagbalik sa karaan nila nga rota subay sa downtown area sa dakbayan sa Sugbo.

Matud ni Romeo Armamento, presidente sa Mandaue United Driver’s Association, padayon sila nga nagpaabot nga ang mga opisyal sa dakbayan sa Sugbo mouyon na nga makapamasahero sila subay sa General Maxilom Avenue paingon sa Fuente Osmeña ug lahos na sa Plaza Independencia.

Si Armamento miingon nga bisan gidid-an sila sa pagsubay sa naandan nila nga rota apan wala gihapon usba sa Land Transportation Franchising and Regulatory Board (LTFRB) ang rota diha sa ilang prangkisa.

Ang mga PUJ sa Mandaue naapektahan tungod sa ordinansa sa dakbayan nga ang tanan nga mga passenger jeepney adto na lang kutob sa mga accredited terminal sa lainlaing dapit sa dakbayan.

Ang mga PUJ sa Mandaue adto ra sila kutob sa mga terminal sa SM City, Ayala ug White Gold. Hinuon, ang uban nga PUJ’s mangawat-kawat og biyahe panahon sa lawom na’ng gabii hangtod sa kaadlawon.

Matud ni Armamento nga balit-ad kaayo ang sitwasyon kay ang mga PUJ-Mandaue nga adunay prangkisa nga makasulod sa dakbayan wala tuguti, samtang ang mga 01K (Urgelio-Port Area) nga kutob ra unta sa dakbayan sa Sugbo gipalahos sa North Terminal nga sakop na sa Mandaue.

Si Armamento nangangkon nga mikunhod g’yud ang ilang kita diha’ng wala na sila tuguti nga makasulod dinhi sa dakbayan sa Sugbo.  (BANAT NEWS)