Mga wanted nangasikop

CEBU, Philippines - Tulo ka tawo nga pulos adunay warrants of arrest nadakpan sa kapolisan sa dakbayan sa Sugbo sa miaging adlaw.

Si Catherine Mae Toralba gidakop tungod sa warrant of arrest sa kaso’ng theft nga giluwatan ni Judge Ma Lynna Adviento sa Regional Trial Court (RTC) Branch 58 kaniadto pa’ng 2012.

Si Toralba nasikop sa mga sakop sa Mambaling Police Station. Sunod nga gidakop mao si Jose Marito Labra, 18-anyos kay wala motungha sa hukmanan atol sa paghusay sa iyang kaso nga theft.

Gidakop si Labra base sa warrant of arrest nga gi-isyu ni RTC Judge Bienvenido Saniel Jr. sa dakbayan sa Sugbo.

Samtang gidakop usab sa mga sakop sa Parian Police Station ang usa ka Roel Hisoler alyas Awing nga wanted sa kaso’ng robbery.

Kaniadtong Biyernes sa buntag nakadawat og kasayuran ang mga polis nga si Hisoler, molupyo sa Barangay Day-as, dakbayan sa Sugbo, nakit-an sa mao nga dapit.

Si Chief Insp. Ryan Devaras, hepe sa Parian Police Station, mipadala dayon og mga polis aron dakpon si Hisoler nga adunay warrant of arrest nga giisyu ni RTC Judge Wilfredo Navarro.  (BANAT NEWS)