Milipat sa kahera salisi nadakpan

CEBU, Philippines - Salisi nga modus sa pagpangilad misiaw sa dakbayan sa Sugbo diin sagad sa ilang biktimahon mao ang mga tindahan pinaagi sa paglipat sa mga tindera.

Apan walay swerte ang duha ka mga suspek nga sila si Marvin Bastes, 29, residente sa Nasipit, Barangay Talamban ug Junrey Baculi, 24, taga Barangay Ermita siyudad sa Sugbo human nasakpan ang ilang modus.

Matud sa biktima nga si Rachiel Batucan ang modus sa mga suspetsado mao ang pagpalit sa tindahan ug gilipat-lipat sila niini ug diretsong punit sa ilang halin.

Dihang nahinabi sa Banat News ang mga suspek si Bastes miingon nga bag-ohay lang siya sa maong binuhatan gumikan ra usab sa iyang higala.  Gani gibutyag ni Bastes nga iyaha lang gisuwayan ang maong modus kun mosaler kini ug iyang giangkon nga sa malipat lang nga tindera.

Si Baculi sa iyang bahin miasoy nga wala siyay kalabutan sa gihimo sa iyang higala nga si Bastes ug igo lang siya nga gidala niini.

Samtang ang Theft and Robbery Section (TRS) sa Cebu City Police Office mipahimangno sa publiko nga kun adunay mamatikdan nga ingon niining panghitabo dili magduha-duha sa pag-report dayon sa kapulisan.

Si PO2 Kenth Raychard Delfin miawhag usab sa mga nabiktima sa mga suspek nga mopatim-aw sa ilang buhatan aron mas madugangan pa ang kaso nga ipasaka batok sa mga dinakpan. (BANAT NEWS)