Nasuko nga gipaninglan, gidunggab patay sa naningil

CEBU, Philippines - Patay ang usa ka molupyo sa Barangay Kalawisan, Lapu-Lapu City diha’ng gidunggab siya sa tawo nga matud pa naningil sa iyang bayranan.

Si Randy Dungog, 42, minyo gihansakan og kutsilyo ni Arvey Berdon, 36, samtang sila’ng duha naglalis tungod kay matud pa nasuko ang biktima nga gipaningil.

Human dunggaba sa makadaghan si Dungog, ang suspek miduol usab ni Franklin Deco, 52, nga nakakita sa iyang pag-atake ngadto sa biktima ug giapil niya sa pagdunggab.

Sa imbestigasyon ni PO1 Jade Querubin, sakop sa Lapu-Lapu City Police, samtang nagpalit og sigarilyo si Dungog sa usa ka tindahan kalit miabot si Berdon ug naglalis ang duha.

Wala makabantay si Dungog nga kalit mibunot og kutsilyo si Berdon ug gihansak sa iyang tiyan sa makadaghan’g higayon. Gidala sa ospital si Dungog apan wala makaabot nga buhi. Si Deco nakaangkon lang og samad sa bukton.

Sa pakisusi ni PO3 Lydo Pinos ug PO1 Jade Querubin nasuta nga kaso sa ilegal nga drugas ang hinungdan sa maong krimen.

Matud pa nga si Dungog gipaninglan ni Berdon sa iyang nakuha’ng drugas nga wala pa mabayri apan nasuko ang biktima ug misangpot og panaglalis. Ang suspek mitahan sa kapolisan. (/RUB)(BANAT NEWS)