Palma: Krimen sa sugbo makapasubo

CEBU, Philippines - Gikasubo og maayo ni Cebu Archbishop Jose Palma ang paghitak sa krimen sa Sugbo nga mikalas na og mga kinabuhi nga dakong kalainan sa paghulagway sa Sugbo nga usa kini ka malinawon nga lugar.

Si Archbishop Palma miingon ang Sugbo usa sa mga lugar nga sagad nga dayuhon sa mga turista ug lugar nga nindot tukoran og negosyo. Apan gumikan sa mga panghitabo karon sama sa pagpatay wa kalikayi sa Arsobispo nga maguol tungod kay dili kinaiya sa mga Sugboanon ang paghimo og krimen kay mahigugmaon kini sa kalinaw.

Giampo usab ni Palma nga mahatagan og hustisya ang mga biktima ug madakpan kadtong mga responsable sa krimen.

Kahinumduman nga daghan kaso sa patay ang nahitabo dinhi sa Sugbo, gani ning bag-uhay lang tulo ka mga Koreano ang gipamatay sa ila ra usab nga kababayan. Ang kapolisan kanunay lang mangangkon nga isolated ra ang maong mga krimen  kay wa kini makaapektar sa kinatibuk-ang sitwasyon sa kahapsay ug kalinaw sa lalawigan. (/EIM)(BANAT NEWS)