Cash incentives nadawat na sa barangay workers sa Toledo
CEBU, Philippines - Nadawat na sa mga barangay workers sa dakbayan sa Toledo ang cash incentives gikan sa kagamhanan sa Probinsya sa Sugbo.
Niabot sa 606 ka mga barangay tanods ang nakadawat og tag P1,500 matag usa ug kapin sa 100 ka mga barangay nutrition scholars, day care center workers ug barangay animal health aide ang nakadawat og tag P2,400 matag usa.
Gipangunayan ni Gob. Hilario Davide III ang pagpangapod-apod sa cash incentives kauban sila si Bise Gob. Agnes Magpale, Bise Mayor Antonio Yapha Jr., Konsehal Merly Abad, Zosimo Abellanosa ug James Gaite.
Wala makatambong si Mayor John Henry Osmeña sa maong kalihukan human aduna kini importante nga lakaw sa dakbayan sa Sugbo.
Gawas sa taga Toledo nakadawat na usab ang mga barangay workers sa lungsod sa Pinamungajan sa samang kantidad.
Una nang gipasabot ni Magpale ang kalangan sa pagpanghatag sa cash incentives human gikwestiyon sa Commission on Audit (CoA) ang legalidad sa pagpagawas sa pundo.
Nasayran nga mokabat sa P47 milyones ang kinatibuk-ang pundo nga ipang apod-apod sa mga barangay workers lukop Probinsya sa Sugbo. (BANAT NEWS)
- Latest
