Pagpaayo sa mga tunghaan nga nagusbat ipadali
CEBU, Philippines - Ang Department of Education (DepEd)-7 mihangop sa hangyo ni Gobernador Hilario Davide, III sa pagpapaspas sa pag-ayo sa mga tunghaan nga nagusbat human sa kalamidad nga miigo nganhi sa Sugbo ilabi na sa amihanang bahin.
Si DepEd Regional Director Carmelita Dulangon nagkanayon nga tinguha usab nila ang pagpadali sa rehabilitasyon sa mga tunghaan apan dili gyud kini matapos sa sunod buwan.
Matud si Dulangon nga karong adlawa aduna silay ipahigayong workshop kinsa mismo ni DepEd Assistant Secretary Rey Laguda uban sa mga engineer, director, division superintendent ug uban usab nila ang region 6, 8 ug ang region IV-B MIMAROPA motambong sa workshop.
Gibutyag ni Dulangon nga ang DepEd may gihimo na nga pamaagi aron di maapektohan ang klase sama sa paggamit sa nagkalain-laing schemes. Lakip niini mao ang duha ang magklase sa usa ka classroom, adunay make shift classrooms.
Sa probinsiya sa Bohol adunay mga classrooms nga nipa ang atop ug amakan ang bongbong ug sa amihanang bahin sa Sugbo migamit og tarpaulin nga gihimong classroom.
Giangkon sa DepEd nga adunay epekto ang maong kausaban ilabi na sa panglawas sa mga tinun-an tungod sa kainit hinungdan nga ang mga magtutudlo mihimo og pamaagi aron dili sila maapektohan.
Nunot niini, ang DepEd nanawagan sa publiko og tabang sama sa paghatag og mga school supplies, tinubuan nga mga tsinelas, sapatos ug bag nga magamit pa aron ihatag sa mga tinun-an nga maglisud sa pagpalit sa maong mga gamit.
Lakip usab sa ilang gihangyo mao ang bugas alang sa feeding program nga ipahigayon sa Department of Education. (BANAT NEWS)
- Latest
