Merkado ayuhon, manindahay di pabalikon

CEBU, Philippines - Daku ang kahigayunan nga ayuhon ang naguba sa linog nga merkado publiko sa dakbayan sa Mandaue apan dili pabalikan sa mga manindahay nunot sa plano nga pabalikon sila sa karaang merkado.

Gipadayag ni Mosuline Suliva, market administrator, nga gikatakda na ang subling pag-inspeksiyon sa mga structural engineers sa kasamtangang kahimtang sa tibuok bahin sa merkado.

Sila ang gitahasan ni Mayor Jonas Cortes sa paghukom kun madala pa kini sa pagpahibalik sa kalig-on.

Matud ni Suliva nga kun ayohon man ang naguba nga merkado publiko ilang gipaneguro nga dili na pabalikan sa pag-ukopar sa mga manindahay.

Giplanohan ni Cortes ang pagtukod og bag-ong merkado sa karaang nahimutangan sa luyong bahin sa National Shrine of Saint Joseph sa Barangay Centro.

Ubos sa plano sa mayor, ayuhon ang naguba sa linog nga merkado  ug paabangan sa mga pribadong negosyo apan dili na isip merkado nga ang baligya mga utanon, isda, bugas ug  uban pa.

Giangkon ni Suliva nga temporaryo lang ang kasamtangan karong stalls nga giokupar sa mga manindahay sa Sitio Tribunal, Barangay Centro human mahunlak ang tungatungang bahin sa edipisyo sa bag-ong merkado sa  7.2 magnitude nga linog niadtong Oktobre. Si Suliva miingon nga gumikan sa pagkaguba sa merkado, iyang namatikdan nga daghan usab nga mga negosyante ang nangundang na sa pagpamaligya.

Base sa daan nga talaan sa gidaghanon sa mga manindahay sa wala pa maguba sa linog ang nahisgutang merkado adunay kapin sa usa ka libo ka manindahay ang nag-ukopar og mga stalls apan karon wala na kaabot sa usa ka libo. (BANAT NEWS)