Duha ka sakop sa CITOM mga adik ‘sab

CEBU, Philippines - Duha ka sakop sa City Traffic Operations Management (CITOM) napositibo sa ilegal nga drugas sa kinalit nga drug test nga gipahigayon sa City Office for Substance-Abuse Prevention kagahapon.

Si CITOM Operations Officer Joy Tumulak mitug-an nga parking aide ug traffic enforcer maoy namatud-an nga tiggamitan og ilegal nga drugas sa drug test nga gihimo sa mga sakop ni COSAP Chief Alice Utlang.

Matud ni Utlang nga 46 ka sakop sa CITOM ang naglangkob sa una nga batch sa mga traffic enforcers ug traffic aides ang gipailawom og drug test. Wala itug-an kun anus-a na usab i-drug test ang uban.

Ang COSAP usab kagahapon mi-drug test sa tanang kawani sa Barangay Tabunan ug walay bisan usa kanila nga napositibo sa ilegal nga drugas, gawas sa tulo nga wala makaapil sa drug test.

Si Utlang miingon nga dili pa sila makadeklarar nga drug-free ang Barangay Tabunan hangtod nga ang tulo makuhaan og drug test unya mamatud-an nga dili sila adik. Miabot na og 105 ka kawani sa kabarangayan ug sa dakbayan ang napositibo sa ilegal nga drugas sukad nga ang COSAP mibalik sa paghingusog sa pagpahigayon og surprise drug test. Matud ni Tumulak nga wala siya masayod kun taktakon ba ang duha ka kawani sa CITOM nga namatud-an nga mogamit diay og gidili nga matang sa drugas. Samtang negatibo ang tanang 40 ka polis nga sakop sa Cebu Provincial Police Office (CPPO) nga gipakalitan og drug test kagahapon, apan adunay laing napulo nga wala motunga.

Matud ni Chief Rodolfo Albotra, hepe sa Provincial Intelligence Branch (PIB), nga iyang ipatawag ang 10 ka polis nga wala motunga sa maong drug test aron makapasabot sila kun ngano nga dili sila silotan. (BANAT NEWS)