Senate Inquiry sa pagplaster sa baba sa masuso’ng bata

CEBU, Philippines - Gisugyot ni Senador Nancy Binay nga himoan og imbestigasyon sa Senado ang gihimo sa usa ka nurse sa Cebu Puericulture Center and Maternity House nga gipapitlan niya’g plaster ang baba sa masuso nga bata aron dili na kini makahilak.

Matud ni Binay nga angay’ng himoan og Senate Inquiry ang pangabuso nga gihimo sa nurse, ilabi na nga ang kadagkoan sa mao nga maternity clinic ingon sa nagtabon-tabon sa binuhatan sa ilang kawani.

Ang kadagkoan sa Commission on Human Rights (CHR), kapolisan ug Department of Social Welfare and Development (DSWD) naghimo na usab og lainlaing pakisusi sa gihimo sa nurse ug gani mibahad nga mokiha batok sa nurse kun makakuha og lig-on nga basihanan.

Sumala ni Binay nga ang Senate Inquiry gitumong aron mapangitaan og paagi nga malikayan ang susama nga panghitabo sa umaabot nga higayon.

Samtang si Cebu Archbishop Jose Palma miawhag sa tagdumala sa maternity hospital nga mihimakak sa pasangil bahin sa reklamo sa ginikanan niadtong bag-ong natawo nga bata nga gipapitlan ang baba og plaster. Gibutyag ni Palma nga kita’ng tanan adunay responsibilidad sa pag-amping sa usa’g-usa ilabi na niadto’ng mga tawo nga walay kapasidad sa paghimo niini.

Matud ni Palma nga makapasagmuyo ang nahitabo sa bata tungod kay ang mibuhat niini mao man ang tawo nga gitugyanan unta nga mohatag og pagtagad sa bata.

Mihimo og pag-ampo ang Arsobispo nga kadtong mga nalambigit sa isyu dawaton nila ang kasaypanan nga ilang nahimo ug mangayo og pasaylo. (BANAT NEWS)