DepEd-Toledo gilungkab

CEBU, Philippines - Gilungkab ang buhatan sa Department of Education sa dakbayan sa Toledo atol sa unang adlaw sa Brigada Eskwela niadtong Lunes sa buntag. Ang administrative officer sa maong buhatan, Jocelyn Loyola, 51, taga dakbayan sa Sugbo, ang mitaho sa kapolisan human nawagtang ang pipila nila ka importanteng gamit.

Nasuta sa gihimong inspeksiyon nilang SPO1 Gerardo Taboada, PO3 Roxam Encerio ug PO1 Readan Lara nga nipugos pag-agi ang kawatan sa luyong bahin sa ikaduha nga andana sa edipisyo ug miagi sa bintana sa may pansayan. Nakuha ang tulo ka nagkalain-laing brand sa computer monitor, AVR Projector, keyboard ug mouse sa computer. Adunay upat ka gwardiya ang buhatan sa DepEd sa dakbayan sa Toledo nga magpuli-puli apan ang tibuok palibot sa tunghaan ang ilang bantayan. (BANAT NEWS)