Trak sa basura way permit dakpon sa Mandaue

CEBU, Philippines - Dakpon sa dakbayan sa Mandaue ang mga dumptrucks nga moagi sa kadalanan nga magkarga og basura nga walay permit.

Si Flash Jerusalem, hepe sa Solid Waste Managemet Office (SWMO), nga nahinabi sa Banat News miingon nga ang ilang pagpanakop pinasubay sa Republic Act 9003.

Matud ni Jerusalem nga ang paghakot og basura gikan sa usa ka establisemento ug ilabay sa laing lugar nagkinahanglan og permit sa ilang buhatan.

Sa dili pa hatagan og permit, sutaon una kung unsa nga matang sa basura nga hakoton sa pagseguro nga dili makadaut sa panglawas sa katawhan.

Daghan na sa mga dumptrucks nga nagkarga og basura ang gipangdakop sa mga eco-wardens sanglit wala kapakita og dokumento nga nagtugot sa ilang pagkarga ug paglabay.

Si Jerusalem miingon nga lakip sa ilang nadakpan mao ang dumptruck nga gipanag-iya ni barangay kagawad Welmer Sanoria sa Canduman, dakbayan sa Mandaue.

Nagkarga ang dumptruck og basura gikan sa usa ka pabrika sa Canduman nga walay permit hinungdan nga gidakop ug nakamulta og P2,000.

Si Jerusalem miingon nga lakip sa nakamulta ang pabrika nga gikuhaan sa basura. (/GMR)(BANAT NEWS)