Usa sa nagpatay ni Ducayag nadakpan na

CEBU, Philippines - Daw sa naibtan og tunok ang pamilya sa gikulata-patay nga si Alfie Ducayag human nga nasikop sa kapulisan ang usa sa duha ka suspetsado pagpatay sa biktima.

Si Jeffrey Aquino, kanhi security personnel sa usa ka department store sa dalan Colon, usa sa duha ka suspetsado sa pagkulata patay ni Ducayag  nasikop  sa mga sakop sa Police Station 2 kagahapon sa buntag.

Gidakop si Ducayag sa mga security personnel sa department store kay gikatahapan nga nangawat apan diha nga gidala sa sekreto nga kwarto didto gitabangan pagkulata. Matud ni Police Chief Inspector Wildemar Tiu, hepe sa Police Station 2, nga aduna sila’y daghang nadawat nga impormasyon kabahin sa gitagoan ni Aquino  ug dali nila kini nga gihimoan og pakisusi ug ilang nakompirmar ang maong report. Usa ka sakop ni Tiu nga si PO2 Gielo Destacamento maoy nakasikop ni Aquino didto sa dalan B. Rodriguez, sakop sa Sambag 1, human nga naghatod kini sa iyang uyab sa iyang gitrabahoan.

Wala na nakaipsot pa si Aquino dihang gisikop kini ni PO2 Destacamento diha’ng nanaog siya sa gisakyan nga PUJ. Matud ni PO2 Destacamento nga dugay na niya nga gipanid-an si Aquino ug nagpaabot lang siya sa husto nga higayon aron iya nga masikop.

Apan si Aquino miingon nga wala siya nagtago-tago sa balaod ug matud pa niya nga nakatakda na unta siya nga motahan sa National Bureau of Investigation kagahapon.  (/RUB)(BANAT NEWS)