Problema sa Electric car

CEBU, Philippines -  Ang dakbayan sa Mandaue maoy una nga lokal nga kagamhanan dinhi sa Sugbo nga nagbaton og Electric Car nga gihimong libreng kasakyan sa mga mamalit sa merkado publiko sa Sitio Tribunal, Barangay Centro.

Magsugod kini pagbiyahe alas sayes sa buntag hangtod sa alas singko sa hapon kun mominos na ang mamalit sa merkado.

Mipapalit si Mayor Jonas Cortes og upat ka E-Car nga maoy giserbisyo alang sa libre nga pagsakay pagpaingon sa bag-ong merkado aron pagkabig og mga pumapalit nga mangompra.

Si Market Administrator Mosuline Suliva miingon nga mata’g usa ka E-Car gipalit sa Mandaue og P500 mil. Duha na lang sa upat ka E-Car ang nagdagan kay ang usa niini giayo pa samtang ang usa gitangtangan og battery kay gibalhin sa laing sakyanan.

Matud ni Suliva nga dili madali ang pagpaayo kun adunay maguba sa mao nga mga E-Car kay dili man dayon mapalit dinhi sa Sugbo ang piyesa.

Panahon nga mahutdan og power ang battery ang drayber mopa-charge niini apan molungtad usa og walo ka oras nga gidugayon usa magamit pagbalik. Ang full-charge nga battery molahutay og lima ka oras nga pagbiyahe.

Ang E-Car hinuon dili na gastoso sa gasolina ug dili usab mobuga og aso mao nga giisip kini nga environmental friendly apan hasol usab kini imentinar.  (BANAT NEWS)