Bag-ong plate number sa sakyanan gipanghatag na

CEBU, Philippines -  Sugdan na sa Land Transportation Office (LTO) ang pag-isyu sa brand new plate numbers alang sa mga bag-o nga i-rehestro nga sakyanan ug kini adunay mga security measures.

Personal kini nga gipakita ni LTO Assistant Secretary Alfonso Tan ngadto sa mga sakop sa media niadtong Biyernes sa wala pa nila sugdi sa pagpang-apod-apod sa mga tag-iya og sakyanan.

Apil sa maisyohan og bag-ong plate numbers mao ang nanag-iya og motorsiklo. Apan gipasabot ni Tan nga ang mahatagan niini mao lang kadtong nakapalit og mga bag-ong sakyanan. Ang maong plaka sa sakyanan may mga security measures nga dili kini dali nga mailisan.

Samtang gipahibawo ni LTO-7 Officer-in-Charge (OIC) Arnel Tancinco nga nakigtigom usab si Tan sa mga opisyal sa LTO dinhi sa Sugbo aron mapadayag nila ang mga problema.

Wala hinuon mahibaw-i kun unsay sulbad ni Tan sa paghunong na sa operasyon sa LTO tungod sa kakuwang og mga regular employees nga madistino sa enforcement section nga manakop sa badlongon nga mga drayber.  (BANAT NEWS)