Dos mil ka magtutudlo ang kinahanglan

CEBU, Philippines - Kapin sa dos mil ka mga magtutudlo ang kinahanglanon sa Department of Education (DepEd-7) alang dinhi sa Sugbo ug sa ubang bahin sa Central Visayas sa pagbukas sa klase sa Hunyo ning tuiga sumala pa sa director sa DepEd-7.

Sigon pa ni DepEd-7 Regional Director Carmelita Dulangon sa interview sa usa ka sibyaanan, wala pay mga bag-ong mga items ug daghan na ang mga magtutudlo nga niretiro karong tuiga ug labaw sa tanan gipaabot nga moburot ang gidaghanon sa mga tinun-an karong tuiga.

Malaumon hinuon si Dulangon nga dali rang makapangita og mga kwalipikadong mga magtutudlo sa Central Visayas tungod usab sa kadaghan sa mga nakapasar sa Teachers Board Examination niining tuiga.

Gipahibawo usab niini nga nagpadayon ang pagpang-enroll sa mga eskwelahan ug wala pa siyay nasugatang mga problema. Gipasidan-an usab ang mga magtutudlo nga nagpabilin ang “no collection policy.” (/EIM)(BANAT NEWS)