21 ka Huey helicopter sa PAF moabot

CEBU, Philippines - Moabot sunod buwan ang 21 ka bag-ong Huey helicopter alang sa operasyon sa Philippine Air Force sa pakiggubat ug panahon sa kalamidad.

Kini ang gipadayag ni Brig. Gen. Rolando Aquino, commander sa Tactical Helicopter Wing (THW), atol sa pagpakighinabi sa Banat News.

Matud ni Aquino adunay 21 na lang ka Huey helicopters ang nagserbisyo sa PAF lukop nasud ug gibahinbahin kini sa mga support units niini.

Hinoon gipasalig ni Aquino nga lig-on pa ug kondisyon pa kaayo ang 21 ka mga Huey choppers nga maoy nagserbisyo sa panahon sa kalamidad ug sa pakiggubat sa mga dapit nga anaa ang insurhensiya.

Matud pa ni  Aquino nga kung dunay mahagsang helicopter kini wala magpasabot nga huyang na ug dili kondisyon ang mga makina niini apan usa sa hinungdan mao ang dapit nga gisudlan.

Atol sa bagyong Yolanda, usa ka chopper ang nahagsa gumikan sa gisudlan niining kabukiran aron lamang mahatud ang mga hinabang ngadto sa mga biktima.

Ang mga Huey helicopter maoy daling magamit sa paghatud sa mga relief goods ngadto sa mga dapit nga dili na maabot sa sakyanan hinungdan nga nagkinahanglan og dugang helicopter ang PAF.

Nunot niini mapasalamaton si Aquino nga sulod ning tuiga moabot na ang dugang 21 ka mga Huey helicopters ug sunod tuig laing 8 ka bell 412 choppers ang gipalit sa nasudnong kagamhanan alang sa dugang sakyanan sa kahanginan sa PAF. (/GMR)(BANAT NEWS)