Papua New Guinean namaak

CEBU, Philippines - Usa ka Papua New Guinean nga hubog ug nagmaoy nagtingkagol sa Mabolo Police detention cell human sikopa sa mga polis kagahapon sa kadlawon diha sa Route Stop Restobar sa Salinas Drive, Barangay Lahug, dakbayan sa Sugbo.

Ang maong langyaw nailhan nga si Nelson Kuna, 24, temporaryong nagpuyo sa Nasipit, Barangay Talamban, dakbayan sa Sugbo ug nagtungha sa kursong nautical sa usa sa mga unibersidad dinhi sa Sugbo.

Ang mga biktima mao si Joseph Bauzon, 35, taga PC Hills, Barangay Lahug, dakbayan sa Sugbo.

Si PO1 Renato Baldo mibutyag nga mga alas 2:00 sa kadlawon si Bauzon kinsa uban sa iyang mga higala nag-inom diha sa nahisgutang restobar dihang kalit lang miduol sa ilang lamesa ang hubog na nga langyaw kinsa gustong motipon kanila.

Giingong ang langyaw nasuko dihang gibalibaran ni Bauzon hinungdan nga giluwaan siya niini ug nahitabo ang komusyon. Ang kamot ni Bauzon natabas kini human mapaaki sa langyaw. Si Bauzon nanawag og polis hinungdan nga nasikop ang langyaw apan matud ni Baldo nga gipagawas usab dayon nila ang langyaw human kini ug si Bauzon nagkasabot.  (BANAT NEWS)