Ilawom sa Mananga Bridge napuno sa bukong

CEBU, Philippines - Gawas sa ubang mga basura, ang ilawom sa tulay sa Mananga dapit sa Barangay Lawaan III, dakbayan sa Talisay gihimo usab nga labayan sa mga bukong.

 Si Mayor Johnny De los Reyes nanawagan sa mga negosyante og butong sa siyudad nga hunongon na ang pagpanglabay og mga bukong diha ilawom sa tulay.

Niadtong Abril 26, ang kagamhanan sa siyudad pinangulohan ni Konsehal Antonio Bacaltos, Jr., chairman sa committee on environment, nagpahigayon og clean-up drive sa nahisgutang lugar ug nadiskubrehan ang mga nagbundo nga mga bukong.

Si De los Reyes nimando sa mga sakop sa Flying Squad sa pagbantay diha sa tulay aron sikopon ang mga magpataka og labay og bukong ug uban pang basura.

Gikataho nga panahon sa kadlawon o gabii ang mga badlongon   manglabay og mga bukong aron walay makakita kanila.

Si Vince Monterde, Public Information Officer sa Talisay ug hepe sa Disaster Risk Reduction and Management Office (DRRMO) nagkanayun nga kinahanglang limpyohan gyud ang sapa sa Mananga aron mahawanan kini sa basura pangandam kung may baha. (BANAT NEWS)