Wanted nga barangay treasurer nasikop

CEBU, Philippines - Nadakpan sa kapolisan ang wanted nga kanhi barangay treasurer sa Tipolo, dakbayan sa Mandaue nga nagtagotago sa kasong malversation ug falsification of public document sa tuig 2006.

Ang nadakpan mao si Michelle Villaruel, 40, nagpuyo sa maong dapit apan sukad niadtong 2009 wala na igkita dihang gipagawas ni Judge Teresita Abarquez Galanida ang warrant of arrest.

Nipasaka sa maong kaso si kanhi barangay kapitan Restituto Villanueva nga karon konsehal na sa maong barangay.

Ang team sa kapolisan sa Presinto 2 sa Mandaue City Police Office (MCPO) nga gipangulohan ni Senior Insp. Miguel Andesa ug kauban ang nakadakop kang Villaruel sa gipuy-an niining panimalay sa sitio Bakante, Barangay Yati, lungsod sa Liloan alas 10 pasado ang takna sa miaging gabii.

Piyansa nga P80 mil sa kasong malversation of public funds ug P40 mil sa kasong falsification of public documents ang girekomendar sa korte alang sa temporaryong  kagawasan sa akusado.

Si Villanueva nga nahinabi sa Banat News miingon nga natigayon ang kaso nga iyang gipasaka batok sa kanhi niya barangay treasurer dihang  ang gipa-in-cash nga tseke nga nagkantidad og P100,000 wala gideposito sa bangko.

Giingong nangutang usab ang akusado og mga construction materials sa usa ka hardware nga gisundog ang iyang pirma ug nipasangil nga alang kini sa gitukod nilang barangay hall.

Matud ni Villanueva nga dihang iyang gisusi uban sa mga sakop sa Commission on Audit (COA) ilang nasuta nga ang materyales nga giutang nga naglakip sa mga bildo didto gitaud sa gipatukod niining panimalay sa Barangay Tipolo. (BANAT NEWS)