Lutoan sa Ngohiong nasunog

CEBU, Philippines - Tungod sa gilutong Ngohiong, usa ka sunog ang miulbo sa Barangay San Antonio, dalan Junquera, dakbayan sa Sugbo sayo kagahapon sa buntag diin kapin sa P300 mil ang gibiling danyos.

Alas 6:54 sa kabuntagon, nagubot ang mga residente human usa ka sunog ang miulbo nga naggikan sa kusina sa Chinese Ngohiong nga nahimutang sa maong lugar.

Sumala sa usa sa mga trabahante sa maong tindahan nga si Josephine Postrero nga samtang nagluto sila og ngohiong sa kusina, kalit lang nga misilaob ang kaha nga gilutoan.

Giingon nga ang nagbukal nga mantika nga nasagulan og tubig ang kalit gikaon sa kayo ug nangaratol na ang mga nagluto nga maoy sinugdanan sa sunog.

Sumala ni SFO2 Lowell Opolentisima nga lima ka balay ang naugdaw ug usa ang partially damage.

Nasayran usab sa Banat News nga apil sa naugdaw ang balay ni James Kee, ang administrative finance officer sa RGMA Cebu.

Giangkon sa kabomberohan nga naglisud sila sa pagresponde sa sunog gumikan sa kasudlonon sa bahin diin miulbo ang kayo ug hinay usab ang tubig gikan sa mga water hydrants.

Miabot sa second alarm ang sunog hinoon walay gikataho nga nasamdan o naangol sa maong insidente. (BANAT NEWS)