Grupo malaumon sa usbaw sa pletehan
CEBU, Philippines - Malaumon ang sektor sa transportasyon nga maaprobahan sa Land Transportation Franchising and Regulatory Board ang petisyon sa pagpausbaw sa minimum nga pletehan.
Kini human unya sa himoong public hearing sa petisyon nga ipatawag sa LTFRB. Si Benjamin Ryan Yu, chairman sa Cebu Integrated Transport Service Cooperative (CITRASCO), ang nipadala sa petisyon ngadto kang LTFRB-7 Regional Director Ahmed Cuizon ug giduso usab kini ngadto sa ilang ulohang buhatan.
Nag-una sa mga rason ang nagpadayong usbaw sa presyo sa produktong petrolyo ug ang daku nga gastohanan sa maintenance sa mga sakyanan matag adlaw tungod sa ka mahal sa pisa, ligid, ug uban pa.
Gipangayo sa CITRASCO ang P2.50 nga usbaw sa minimum nga pletehan gikan sa kasamtangang P7.50 sa unang lima ka kilometros ngadto na sa P10 matag pasahero.
Si Romeo Armamento, presidente sa Mandaue United Driver’s Association-National Transport-workers Confederation Alliance (MUDA-NTCA), miingon nga ang pagpausbaw sa minimum nagkinahanglan gayod og tukmang pagtoon sa dili pa ipatuman.
Gipasabot niya nga samtang makaayo ang pagpausbaw sa pletehan ngadto sa mga drayber apan dugang kalisud usab ang maangkon sa mga sumasakay ug ubang sektor sanglit mosunod man sa pag-usbaw sa presyo ang mga nag-unang palaliton.
Nunot niini nanawagan si Armamento sa katawhan sa pagtambong sa public hearing aron sa pagpabati usab sa ilang panahom.
Hinuon si Cuizon miingon nga ang iyang buhatan andam usab modawat sa mga sinulat nga baruganan sa nagkalainlaing sektor nga dili makahigayon sa pagtambong sa public hearing nga ipatawag sa ilang buhatan. (BANAT NEWS)
- Latest
