Pamilya girapido, usa patay

CEBU, Philippines - Namatay ang usa ka 32- anyos nga lalaki samtang samdan sa ulo ang iyang kapuyo human girapido sa duha ka wa mailhing mga tawo ang ilang panimay niadtong Domingo sa gabii  diha sa Sitio Matabang , Barangay Buaya sa dakbayan sa Lapu-Lapu.

Ang magtiayon nga girapido sud sa ilang panimay nailhan nga sila si Eduardo Bernardo 32, ug ang kapuyo niini nga Geinivev Villarin, 32, usa ka factory worker.

Base sa imbestigasyon sa kapolisan nga sa wa pa ang nahisgutang pagpamusil naghinagwaay pa ang magtiayon ug grabe usab kaayo ang ilang kinataw-anay .

Apan tungatunga sa ilang kinataw-anay kalit lamang nga may mirakrak sa ilang balay.

Sa pasiunang imbestigasyon ni PO3 John Carlo Jocutan nasayran mga alas 10:00 sa milabay’ng gabii kalit gisud sa duha ka tawo ang ilang balay ug dayong pusil kang Bernardo lima ka higayon sa iyang ulo ug dughan. Samtang si Villarba nga nanghugas og plato giapil kini pagpusil sa ulo hinungdan nga dali kining gidala sa tambalanan ug anaa sa kritikal nga kondisyon sa pagsuwat ning balita. Swerte na lang nga nakadagan ang 4-anyos nga bata kay mao untay isunod sa pagpusil sa suspek apan wala kini makabuto. Si Elizabeth Bernardo igsoon ni Eduardo daling nakaresponde sa maong hitabo ug maayo na lang nga wala makabuto ang armas sa suspek sa dihang siya na usab ang giatubang sa mga suspek.

Si Atienza kinsa nagpuyo tupad sa balay sa mga biktima daling migawas ug gisusi kun unsay mga nahitabo sa gawas apan gitionan siya og pusil sa usa sa mga armadong lalaki hinungdan nga misulod kini og balik sa iyang balay.

Matud niya nga nakadungog siya nga nagsiyagit ug nangayo og tabang ang iyang kabanay sa pikas balay samtang nagpadayon ang pagpangrakrak sa mga lalaki. Swerteng  wa gyud maigo sa bala ang ilang 4- anyos nga anak nga lalaki kinsa padung na untang matulog niadtong higayona.

Matud pa ni Atienza nga ang mga suspek nagsul-ob og pula nga jacket ug pula nga baseball cap samtang ang laing usa nagsul-ob ug itom nga t-shirt.

Ang kapolisan usab nakakuha og onse ka kabhang sa .45 nga pistola ug tulo ka mga slugs niini. Mitug-an si Atienza nga napriso na sa kasong pagpangawat si Eduardo kaniadto ug miapil kini sa pagpamaligya og illegal drugs. Matud niya nga gitambagan pa kaniadto sa ilang inahan si Eduardo nga dili mopuyo sa ilang panimalay aron dili maangin sa mga kaso nga naglambigit sa illegal drugs hinungdan nga naglain kini og puyo uban sa iyang kapuyo. (/EIM)(BANAT NEWS)