Traysikad butangan g’yud og reflector

CEBU, Philippines - Mga traysikad nga gigamit sa personal nga katuyoan ug sa pagpamasahero sa dakbayan sa Talisay sikopon na unya kun walay gibutang nga reflector aron makatabang paglikay sa aksidente.

Si Konsehal Socrates Fernandez misugyot og ordinansahon nga magdili sa mga traysikad nga motadlas diha sa karsada sa siyudad kun walay mga reflector sa likud ug sa atubangan. Ubos sa nahisgutang ordinansa, ang mga traysikad kinahanglang magbutang g’yud og reflector o kaha battery-powered blinker.

Matud ni Fernandez nga ubay-ubay na nga mga aksidente sa kadalanan nga naglambigit og traysikad ang nahitabo sa Talisay ug uban nga mga dapit panahon sa gabii.

Adunay mga traysikad nga usahay mabanggaan kay dili dayon  mabantayan sa ubang mga motorista tungod kay walay suga ug wala usab butangi og reflector. Si Fernandez, tsirman sa Committee on Laws sa Konseho, miawhag sa mga tag-iya og traysikad sa pagdala sa ilang sakyanan ngadto sa City of Talisay-Traffic Operation Development Authority (CT-TODA) kun aduna nay reflector o blinker aron kini ma-rekord.

Kun aprobahan ang ordinansa, ang mga traysikad nga masakpan’g wala’y suga o wala’y reflectors sakmiton ug ipalukat kini og P300 sa una’ng kalapasan, P500 sa ikaduha’ng pagkasikop, ug P1,000 nga multa o priso sulod sa usa ka semana sa ikatulo nga kalapasan.

Human sa ikatulo kun madakpan lang gihapon, ang tag-iya sa traysikad dili na tugotan nga mag-operate og mga traysikad sa dakbayan. (BANAT NEWS)