Babaye gitanggong gyud sa “kulto”
CEBU, Philippines - Amahan sa batang giingong gipatay ug gilubong sa tunnel sa ilawom sa balay sa gipasanginlang lider sa kulto sa Barangay Buanoy, Balamban mibutyag nga magsige siya og kadungog og babayeng maghilak gikan sa villa sa giila nga Dios Amahan nga si Casiano Apduhan alyas Tatay Loloy.
Matud pang Eleuterio Repuela, 51, kinsa gihimong usa sa mga testigo sa prosekusyon nga nagtuo gyud siyang ang maong babaye mao ang 33-anyos nga si Emma Nepomuceno, ang babayeng giingong lima ka tuig nga gitanggong sud sa compound ni Apduhan.
Ang husay gihimo diha sa Presiding Judge Hermes Montero sa Regional Trial Court RTC Branch 59 diha sa Palace of Justice sa dakbayan sa Toledo.
Ang National Bureau of Investigation (NBI) 7 ug ang Provincial Women’s Commission mipasaka og kasong serious illegal detention batok ni Apduhan.
Kahinumduman sa gipahigayong pagdungog niadtong Mayo 6, hugot nga gihimakak ni Nepomuceno ang pasangil nga gitanggong siya ni Apduhan sa panimalay niini sulod sa dul-an lima ka tuig.
Gikatakda usab sa Mayo 15 mopresentar og laing testigo ang kampo sa prosekusyon kalabot sa maong kaso.
Ang abogado sa akusado nangangkon nga lig-on ang ilang ebidensya aron maabswelto ang iyang kliyente. (/EIM)(BANAT NEWS)
- Latest
