CEBU, Philippines - Maimplementar na ang Cash-For-Work-Assistance Program sa Overseas Workers Welfare Administration (OWWA) alang sa mga miyembro sa OWWA ug ilang pamilya nga naapektuhan sa super typhoon Yolanda sa miaging tuig.
Si OWWA Regional Director Wilfreda Misterio miingon nga ang makaapil ra sa maong programa mao ang mga aktibong miyembro sa OWWA. Kung wala ang maong OFW mamahimong usa sa iyang pamilya ang morepresentar apan kinahanglang legal na sila sa ilang edad.
Ang mga lungsod dunay himuong rehabilitasyon sa mga government buildings, facilities, health centers, kalsada, dunggoanan, tourism sites ug tulay, pagpanglimpyo sa mga kanal ug suba ug pagpananom og bakhaw.
Ang Regional Disaster Risk Reduction and Management Council (RDRRMC) maoy mitugot sa 16 ka mga lungsod nga makaapil sa maong programa nga gigahinan og P9.1 milyones nga gilangkoban sa Daanbantayan, Pilar, Poro, Sogod, Tabuelan og Tudela.
Mokuha ang OWWA og 1,852 ka trabahante nga motrabaho sulod sa 15 ka adlaw ug mosweldo sila og P327 kada adlaw.
Si Provincial Governor Hilario Davide III mipasalig nga gisigurado sa OWWA nga layo sa disgrasya ang mga trabahante ug siya mapasalamaton sa maong lakang.
Si Misterio miingon nga ang ikaduhang bahin sa programa pagahimoon sa dili pa ang katapusan sa Mayo nga gilangkoban sa Bantayan, Bogo City, Borbon, Madridejos, Medellin, San Remegio, Santa Fe, Tabogon, Tuburan ug San Francisco. (/EIM)(BANAT NEWS)