Constantino hulipan karong adlawa

CEBU, Philippines - Karong adlawa himoon ang turnover ceremony sa bag-ong molingkod nga director sa kapulisan sa Police Regional Office (PRO7).

Alas- 4 sa hapon himoon ang turnover ceremony sa Regional Police Office 7 nga pangunahan ni Police Regional Director, Chief Supt. Danilo Constantino.

Sa impormasyon nga nadawat sa Banat News, posible nga ang mohulip ni Constantino mao si Chief Supt. Prudencio Tom Banas, ang hepe sa PNP Human Rights Affairs Office sa Campo Crame. Sa Campo Crame na usab madestino si Constantino sa Directorate for Police Community Relations Office isip kabahin sa iyang promotions.

Si Chief Supt. Banas maoy usa sa mga opisyal sa kapulisan sa kaulohan nga  gikontak sa kampo ni Deniece Cornejo aron didto kini mosurender human gipangita sa kapulisan may labot na sa kasong giatubang nga gipasaka sa TV host actor Vhong Navarro. (Jojo C. Ugdol/EIM)

Drug test sa Kapitolyo ipasunod sa mga LGUs

Giawhag sa Kapitolyo ang mga siyudad ug kalungsuran sa pagpahigayun usab og drug test sa mga empleyado.

Kini nunot sa taho nga nagkadaghan ang tiggamitan sa ilegal nga drugas sa mga hilit nga lugar.

Gani sa miaging adlaw, usa ka kawani sa munisipyo sa lungsod sa Dumanjug ug gidudahang druglord ang nasikop sa mga awtoridad.

Matud ni Bise Gob. Agnes Magpale nga igo lang sila makaawhag sa ubang lokal nga opisyal nga mopahigayun usab og drug test sama sa gihimo sa Kapitolyo.

Uyon usab si Magpale sa sugyot ni Joey Herrera, executive director sa Cebu Provincial Anti-Drug Abuse Commission, nga magmabinantayon sa pagdawat og mga empleyado labi na kay daghan ang nagpositibo sa miaging mga drug test nga gipahigayun.

Dugang ni Magpale nga susihon una pag-ayo ang mga empleyado usa kini irekomendar nga patrabahoon.

Si Gob. Hilario Davide III sa sayo pa miingon nga ideretso patangtang ang mga empleyado nga mahibaw-ang magpositibo sa ilegal nga drugas. (BANAT NEWS)