Gadgets, kwarta nakuha sa linungkabay
CEBU, Philippines - Mga electronic gadgets ug kwarta ang gipangkuha sa mga wala mailhing kawatan sa nagkalainlaing lungkab sa dakbayan sa Sugbo ug Mandaue. Ang tulo mga tinun-an sa Cebu Institute of Medicine sa Velez College sa Paknaan, dakbayan sa Mandaue nga mao sila si Mark Oswald Verdida, 25; Junrey Go, 23 ug John Joseph Diaz, pulos taga dakbayan sa Sugbo. Si SPO1 Edmund Bilacora sa Presinto 3 sa Mandaue City Police Office (MCPO) miingon nga gisakiyo sa mga kawatan ang mahalon nilang mga kahimanan sa medical, laptop, mga alahas ug kwartang mokabat sa P30,000. Laing biktima sa pagpangawat mao si Rodney Cabahug, 31, taga Barangay Tabok, dakbayan sa Mandaue.
Gisakiyo ang laptop, relo, ariyos nga bulawan ug salapi nga P10 mil.
Si SPO3 Marcos Noval Jr. sa Investigation Detection and Management Bureau (IDMB) miingon nga nagpadayon pa usab sila og follow-up sa pagpanglungkab nga nahitabo sa usa ka panimalay sa Barangay Alang-Alang nga dakong kantidad usab sa mga butang ang nasakiyo sa mga kawatan.
Sa dakbayan sa Sugbo, balay sa usa ka call center agent nga si Ryan Bangud, 29, ang gilungkab sa niaging adlaw sa Barangay Kamputhaw. Usa ka wala mailhing tawo ang misulod sa kwarto sa biktima pinaagi sa pagguba sa padlock sa pultahan.
Nakuha ang Vio laptop nga nagkantidad og P35 mil, usa ka Sony PSP balor og P13 mil, usa ka Seiko divers watch balor og P14 mil ug usa ka Nokia A63 cellphone balor og P7 mil.
Sa laing bahin, usa ka babaye ang gi hold-up sa may New Imus Road, Barangay Lorega San Miguel, dakbayan sa Sugbo.
Ang biktimang si Faustina Beldad Rivas, 25, nakuhaan sa iyang Samsung cellphone balor P8 mil ug Unisilver nga kwentas balor og P2 mil. (BANAT NEWS)
- Latest
