Mga snatchers sa Mandaue hiposon atol sa piyesta

CEBU, Philippines - Hiposon sa kapolisan ang mga mangunguot ug manglabnihay nga masigpatan nga mosagol sa daghang mga tawo nga mosuroy karong adlawa sa pagsaulog sa kapistahan sa dakbayan sa Mandaue.

Si Chief Insp. Jimmy Aguisanda, hepe sa Presinto 1 sa Mandaue City Police Office (MCPO), miingon nga ang paghipos sa mga dautang elemento nga ilang masigpatan karong adlawa maoy nag-una nilang pagahimoon.

Gidestino na niya ang mga sakop sa mga dapit nga maoy tapokan sa daghang mamistahay sa dakbayan karong adlawa alang sa paghatag kanila og seguridad.  Naglakip sa gidestino ang nag-unipormeng mga polis, nagsibilyan ug ingon man mga barangay tanod ug giabagan usab sila sa nagkahugpong nga mga sibilyan nga mahigugmaon sa kahapsay ug kalinaw.

Matud ni Aguisanda nga ang mga sakop sa City Public Safety Company (CPSC) gipadala usab sa ilang headquarters sa MCPO alang sa pagtabang sa pagpatuman sa kahapsay sa tinuig nga pangilin.

Si Aguisanda miingon nga ang mga dautang elemento   ilang panghiposon pinaagi sa pagdala sa ilang buhatan kun wala pa kini makahimo og krimen. (Romeo T. Limpangog/GMR)

Kubkob sa bas sa Mananga nakapaalarma

Naalarma si Konsehal Antonio Bacaltos Jr. sa dakbayan sa Talisay sa giingong pagpangubkob sa sapa sa Mananga.

Si Bacaltos nga chairman sa committee on environment mibutyag nga usa ka construction firm ang nigamit sa ilang heavy equipments sa pagpangubkob sa nahisgutang sapa.

Matud ni Bacaltos nga ang machine operator dihang iyang gikahinabi mibutyag nga nagpahigayun sila og proyekto sa Department of Public Works and Highways. Nakugang ang konsehal tungod kay walay nilukat og dredging permit gikan sa kagamhanan sa siyudad.

Nunot niini matud ni Bacaltos nga iyang ikonsulta sa Provincial Environment and Natural Resources Office ang maong isyu. Nagplano usab si Bacaltos sa pagsusi sa ordinansa sa siyudad kabahin sa pag-regulate sa dredging una niya ipresentar ang maong isyu ngadto sa konseho sa Talisay.

Si Bacaltos mikwestiyon kung asa i-deliver sa maong construction firm ang kinubkob nga bas gikan sa Mananga. (BANAT NEWS)