Solo Parents Ordinance gipasar na sa Konseho
CEBU, Philippines - Final na. Makadawat na og financial assistance ang mga single parents sa dakbayan sa Sugbo gikan sa kagamhanan sa dakbayan.
Kini human naaprobahan na g’yud sa hingpit kagahapon ang giduso ni Konsehal Gerardo Carillo nga P5,000 cash assistance pinaagi sa usa ka botasyon nga gipahigayon sa 14 ka mga konsehal.
Siyam sa mga konsehal, lakip na si Carillo, ang niisa sa ilang kamot nga uyon sa ordinansa, samtang duha ang wala niaprobar, sila si Konsehal Mary Ann delos Santos ug Konsehal Hans Abella.
Tulo usab sa mga konsehal ang ni-abstain, sila si Konsehal Noel Wenceslao, Eugenio Gabuya, Jr., ug James Anthony Cuenco.
Nagpahigayon og botasyon ang Konseho human dunay uban sa mga konsehal ang wala niuyon sa maong ordinansa nga giduso ni Carillo.
Si delos Santos, usa sa mga wa makumbinser sa maong sugyot, nagkanayon nga dili praktikal ang maong ordinansa. “It’s another form of dole out. We teach them how to fish,†si Delos Santos nagkanayon, siya nabalakang maabusaran ang maong ordinansa sama sa nahitabo sa cash assistance sa mga senior citizens nga nanaghan ang nagpa-register sa Cebu City human makahibaw sa maong hinabang.
Limitado ra usab ang makabenepisyo sa maong ordinansa kay ang tagaan lang og hinabang mao ang mga solo parents nga nakabotar na sa tulo ka nag-sunod-sunod nga eleksyon sa dakbayan ug duna lama’y annual gross income nga ubos sa P60,000.Ang konsehal nagkanayon nga pwede pa man usab nila iimprove ang maong ordinansa una kini i-implementar. (BANAT NEWS)
- Latest
