Lumod napadpad sa baybayon

CEBU, Philippines - Patay nang napalgan ang usa ka dolphin o lumod sa baybayon sa sitio Angasil, Mactan dakbayan sa Lapu-Lapu sa milabay’ng hapon. Matud pa ni Christopher Paquibot sa Task Force Kalikasan sa milabay’ng hapon napalgan sa mga residente sa maong dapit ang dolphin nga naglutawlutaw ug napadpad sa kabatuhan sa maong dapit.

Nasuta sa TFK dunay bun-og sa ulo ang maong lumod nga gituohang agi sa gahi nga butang apan walay samad nga nakita sa lawas niini. Gibanabana nga usa na ka tuig kapin ang pangidaron sa maong lumod 2.3 metros ang gitas-on ug nagduda ang TFK nga tulo ngadto sa upat na ka adlaw kining namatay.

Gumikan kay anaa na kini sa pagkadugta nakahukom ang mga sakop sa Bureau of Fisheries and Aquatic Resources-7 nga sa dumpsite sa dakbayan sa Lapu-Lapu ilubong ang maong dolphin. Si Mayor Paz Radaza momando sa mga sakop sa TFK nga protehian kung duna pay mga dolphin nga anaa sa kadagatan sa isla sa Mactan aron dili mapasipad-an. (Bong Soriano/EIM)

Sextortion sa Cebu gipanid-an

Ang Provincial Intelligence Branch nakig-alayon na karon sa Anti-Cybercrime Group-7 sa pagsubay kung aduna bay sextortion syndicates sa probinsiya sa Sugbo matud ni chief Supt. Rodulfo Albotra Jr.

Si Albotra miingon nga wala pa man usab silay nadawat nga reklamo gikan sa 50 ka mga police stations. Dugang niya nga ang sextortion mahulog nga private crime ug lisod kini nga masakpan sa awtoridad ug tungod niini nagkinahanglan sila og kooperasyon sa publiko.

Apan gisaad sa hepe sa PIB nga ila gyud nga aksyonan kung aduna may reklamo kabahin niini. Bag-uhay lang 58 ka mga suspek ang nasikop gumikan sa sextortion sa kauluhan. Base sa reports, nga amiguhon una sa suspek ang biktima sa dili pa niya sabuton nga mohimo og law-ay nga buhat atubangan sa camera nga i-record sa suspek. Human niini, bungatan sa suspek ang biktima og kantidad bugti sa dili pagpagawas sa sex video online. Si PNP Chief Alan Purisima mipahibalo na usab sa publiko sa pagbantay sa mga tawo nga ilang ma-meet online. (BANAT NEWS)