Market administrator sikop sa PDEA

CEBU, Philippines - Ang market administrator sa lungsod sa Dumanjug kinsa gidudahang druglord ang nasikop sa mga sakop sa Philippine Drug Enforcement Agency-7 atol sa ronda nga gihimo sa iyang panimay nga giingong drug den sa Barangay Cogon kagahapon.

Ang operasyon gipangulohan mismo ni PDEA-7 Director Esperidion Javier alas 10:00 sa buntag nga miresulta sa pagkasikop ni Jose Perfecto Amadora, 60; ug laing upat nga sila si Lover John Castro, 20; Michael Piega, 40; Ronilo Miquezo, 33 ug Emilio Sabino, 33, pulos taga Dumanjug.

Ang PDEA-7 armado og search warrant nga giluwatan ni Cebu City Regional Trial Court Branch 19 Judge Wilfredo Navarro niadtong  Mayo 2, 2014.

Nasakmit sa mga awtoridad ang 20 ka paketeng shabu nga gibanabanang mobalor og P300 mil, timbangan ug mga kahimanan sa pagsuyop og shabu, ug duha ka caliber .40 pistols sulod sa panimay ni Amadora. Matud ni Javier nga niabot og walo ka buwan ang ilang pagpaniid kang Amadora kinsa giingong nagpadagan sa labing dako nga drug den sa lugar.

Giingong abot sa Negros Oriental ang pagpamaligya ni Amadora sa ilegal nga drugas. “Kung walang case study, mahirap, malaki ang distribution area,” si Javier nagkanayon.

Matud pa ni Police Inspector Wilter Grapa ang hepe sa Dumanjug PNP nga nahinabi sa Banat News, nga alas 10:30 sa buntag nakig-coordinate ang moabot sa 20 ka mga PDEA agent, alang sa ilang operasyon sa maong lugar.

Dali gilayon nila nga gilibutan ang balay sa ilang target ug wala na gyud kini nakalugar pa sa pag-ikyas.

Ang lugar gikoral og alambre, puno sa mga tanum, dunay baboyan, tree house ug tulo ka kubo-kubo diin nasikop ang mga kauban ni Amadora nga nagsuyop og shabu.

Namatikdan usab ang mga gipahimutang nga kahimanan sama sa close circuit television camera ug mga warning devices aron pag-ila sa mga mosulod sa lugar. Apan ang maong mga kahimanan wala makapugong sa mga sakop sa PDEA-7 atol sa ronda kagahapon.

Gihimakak ni Amadora nga nagpadagan siya og drug den hinoon iyang giangkon ang mga armas nga lisensiyado sanglit sakop siya sa usa ka gun club. Nagtuo si Amadora nga biktima siya sa away sa politika sanglit ilado siya sa habig ni Mayor Nelson Garcia. Si Amadora nipasangil nga planted ang shabu nga nasakmit sa PDEA.

“Sakit kaayo ning ilang gibuhat, sama ra nga ila kong gipatay,” pahayag ni Amadora. Matud niya niuli lang siya aron pagkuha sa bill sa telepono aron unta iya kining bayaran kagahapon.

Ang kasamtangang mayor nga si Bise-Mayor Efren Guntrano Gica nikompirmar nga si Amadora nagdawatan pa og P15 mil matag buwan nga sweldo isip market administrator.

Nagpasalamat si Gica sa pagkasikop ni Amadora kinsa giingong ilado na nga druglord ug nanghinaut nga masikop pa ang laing usa.

Si Garcia sa iyang bahin nipahalipay usab sa PDEA sa pagkasikop kang Amadora kung tinarung lang ang ilang operasyon.

“Tarung man ni siya (Amadora), rumors gikan ra sad sa side ni Gica. Wa kaayo ko motoo ana. Hinaut nga kini tanan, if proven true, wa tay mahimo,” matud pang Garcia. (BANAT NEWS)