Mga armas nasakmit sa Danao
CEBU, Philippines - Ubay-ubay’ng armas ang nasakmit atol sa gihimong ronda sa kapolisan sa dakbayan sa Danao sa niaging adlaw.
Ang Criminal Investigation and Detection Group-7 milusad og operasyon human nadawat ang taho nga adunay daghang armas nga gitagoan sa usa ka Edmundo “Nonoy†Castro sa Barangay Suba, dakbayan sa Danao.
Si Castro giingong usa ka tig-ayo og mga armas sa maong lugar.
Ang team gilangkuban nilang Supt. Fermin Armendarez III, Insp. Delfin Bontuyan, SPO4 Roel Leyson, SPO1 Jackson Rivera ug PO3 Arturo Enriquez inabagan sa kapolisan sa dakbayan sa Danao.
Pakyas pagsikop ang grupo kang Castro apan ilang nasakmit ang daghanang armas sama sa 10 ka .45 caliber pistol, usa ka 9mm Ingram machine pistol, 357 revolver, 9mm revolver, 12 ka magazines sa .45 caliber pistol, duha ka magazine sa Ingram machine pistol ug 100 ka nagkalain-laing bala.
Bisan nakaikyas ang target sa operasyon, ang CIDG mopasaka gihapon og kiha sa paghupot og ilegal nga mga armas batok sa suspetsado.
Ang maong operasyon giingong tipik lamang sa kampanya sa maong buhatan batok ilegal nga mga armas sa rehiyon 7. (/GMR)(BANAT NEWS)
- Latest
