P300M para sa CCMC i-deposito sa trust fund

CEBU, Philippines - Tukion karong Miyerkules sa Konseho sa siyudad sa Sugbo ang sugyot nga i-deposito sa usa ka trust fund ang P300 milyones nga gigahin alang sa pagtukod sa bag-ong Cebu City Medical Center (CCMC).  Ang resolusyon nga gipirmahan nilang Konsehal Margarita Osmeña ug Mary Ann De Los Santos nagkanayon nga gusto nilang masiguro nga ang maong kantidad magamit alang ra gyud sa CCMC. Laing konsehal nga si Lea Japson gipaabot nga mo-endorsar sad sa maong resolusyon.

Kahinumduman nga ang Konseho migahin og P300 milyones pinaagi sa usa ka supplemental budget sayo ning tuiga human ang CCMC gideklarar na nga peligro na kaayong gamiton human sa 7.2 magnitude nga linog niadtong miaging tuig.

Sa usa ka exclusive interview sa Banat News kagahapon, silang Osmeña ug Delos Santos miingon nga mas maayong klaro gyud kun asa mahimutang ang kwarta aron maseguro nga adunay ikagasto sa panahon nga sugdan na ang pagtukod sa ospital. 

Ang resolusyon nag-awhag ni City Treasurer Diwa Cuevas nga ideposito dayon sa trust fund ang P300 milyones ug hatagan og kopya sa deposit slip ang Konseho. Uyon usab ang duha nga  ipunon ang maong kantidad sa gibanabanang P12 milyones nga natigom sa piso-piso campaign ni Mayor Michael Rama. (BANAT NEWS)