Talisay nagkuwang og firetrucks

CEBU, Philippines - Ang kabomberohan sa dakbayan sa Talisay nagkinahanglan og dugang firetrucks ug ubang kagamitan sa pagresponde og emerhensiya dili lang sa sunog.

Matud ni Talisay City Fire Marshall Randy Mendaros nga nagkinahanglan sila og firetruck penetrator o gamay nga firetruck apan kinahanglan nga kusgan ug makatungas sa bukid nga lugar. Ang firetruck penetrator maoy mosulod ngadto sa mga lugar nga gamay ang agianan panahon nga dunay sunog.

Matud ni Mendaros nga sa ilang pakisusi sa kabarangayan sa Talisay ubay-ubay ang lugar nga gagmay ang mga karsada.

Gawas sa firetruck penetrator matud ni Mendaros nga nagkinahanglan usab sila og water tanker truck.

Ang water tanker daku kaayo og matabang panahon sa sunog tungod kay mao kini ang mag-supply og tubig ngadto sa mga firetruck aron dili maputol ang pagpasirit sa tubig. Gawas niini, matag tuig panahon sa huwaw, ang kabomberohan maoy mosuplay og tubig ngadto sa mga molupyo sa bukirang barangay ug matud ni Mendaros nga daku og matabang niini ang water tanker.

Ang Talisay adunay upat lang ka firetruck gawas sa usa ka aerial ladder truck nga gamiton sa mga bombero kun kinahanglan nga mosaka sila sa taas nga building.

Duha sa mga firetruck sa Talisay anaa pa sa motorpool tungod kay gipaayo ang gubaon nga clutch. Gawas sa sunog, ang kabomberohan sa siyudad moresponde usab sa ubang emerhensiya sama sa baha.

Matud ni Mendaros nga kuwang ang ilang rescue equipment. Lakip sa mga gikinahanglang ekipo sa kabomberohan sa Talisay mao ang pisi nga gamiton nila sa pagkanaug pagdali gikan sa taas nga building ilabi na kun magluwas sila og tawo, apil ang mga maanod sa baha.

Nagkuwang usab ang mga bombero og handheld UHF radio sets alang sa ilang komunikasyon ug cutter spreader nga gamiton pagtabas sa sakyanan panahon nga adunay mahitabong bangga ug mapiit ang mga tawo nga sakay.

Si Mendaros miingon nga ang iyang panginahanglan napadangat na niya sa kadagkoan sa City Disaster Risk Reduction and Management Council (CDRRMC) ug sa kagamhanan sa siyudad.

Malaumon si Mendaros nga magahinan unta og budget sa siyudad ang pagpamalit sa gikinahanglan nga ekipo ug firetruck. (BANAT NEWS)