Sweldo sa cash for work program sa DSWD sa Talisay gi-release na
CEBU, Philippines - Mga residente sa dakbayan sa Talisay nga nakabenepisyo sa “cash for work†sa Department of Social Welfare and Development (DSWD) nasweldohan na niadtong milabay’ng Miyerkules.
Kahinumduman nga ang maong mga benepisyaryo nagbagulbol sa milabay’ng buwan tungod kay wala pa sila makadawat og suweldo gikan sa DSWD.
Si Talisay City Social Welfare Officer, Felipa Solana mipasabot nga nalangan ang pagpanghatag og sweldo sa mga beneficiary tungod kay dili man ang city hall maoy miandam sa payroll sa suweldo ang DSWD man.
Ang cash for work programa kini sa DSWD alang sa mga kabus nga walay trabaho. Sa maong programa ang usa ka beneficiary makatrabaho sulod sa napulo ka adlaw.
Matag usa sa beneficiary nakadawat kini og P2,450 nga sweldo niadtong Miyerkules. Ang maong programa nagsugod niadtong buwan sa Pebrero niining tuiga ug ang nakapahimulos niini gipatrabaho isip manglimpiyo diha sa barangay.
Mikabat ngadto sa 1,000 ka kabus nga mga Talisaynon ang nakapahimulos sa maong programa. (/EIM)(BANAT NEWS)
- Latest
