Mabangkarota ang MCWD kun di mopaumento sa ilang singil
CEBU, Philippines - Mihulga ang Metropolitan Cebu Water District kon MCWD nga kun dili mapatuman ang pagtaas sa presyo kada cubic meter sa tubig posibleng mabangkarota sila ug maproblema niini ang mga konsumidor kun asa mokuha og tubig.
Kini maoy reaksyon ni MCWD Assistant General Manager for Operations Ernie Delco sa dihang gipatawag sila sa Cebu City Council aron paesplikaron sa mga konsumidor kun nganong kinahanglan nilang mopaumento sa singil sa tubig.
Karon, mobayad ang mga konsumidor og P13.60 kada cubic meter ug nangayo sila og umento nga P1.63 kada cubic meter.
Mipasalig ang mga opisyales sa MCWD nga motambong sila sa public hearing nga ipahigayon karong Mayo 7 sa Cebu City Session Hall atubangan sa mga konsehal ug mga konsumidor.
“Kami diri sa MCWD, ganahan pud mi mo-explain kay mao man na atong trabaho, to let the people understand because bisan og singko sentabos pa ‘na imong gi-increase diha, kun dili sila kasabot masuko gyud na sila.
Ug bisan og 100 pa ‘na imong i-increase, kun kasabot sila, wala gyud na’y problema,†sigon ni Delco.
Walo na ka tuig ang milabay dihang kataposang nangayo og umento ang MCWD.
Sumala pa sa MCWD tuig 2005 pa sila nagsugod og hangyo sa maong increase.
Matud ni Delco, kun mag-increase ang ubang palitonon parehas sa gasolina, dili mahibulong ang mga tawo kay naanad na kini.
“Kini hinuong tubig, nga mas basic pa man siguro sa gasolina, pero depende who’s talking, kun mag-increase, daghan og mo-question,†dugang niya.
Alang ni MCWD Chairman of the Board Renato Mercado, dili nila masugdan ang pagpalambo sa ilang sistema ug uban pang mga kaugmaran alang sa katawhan kun dili molambo ang ilang pinansyal nga kapabilidad.(/EIM)(BANAT NEWS)
- Latest
