P300 mil danyos sunog sa G’dalupe
CEBU, Philippines - Kapin sa P300 mil ang danyos sa sunog nga niigo sa sityo Sandayong, Barangay Guadalupe, dakbayan sa Sugbo kagahapon sa buntag.
Tulo ka balay ang maayong pagka-ugdaw samtang duha ang partially damage.
Matud ni Cebu City Fire Marshall, Chief Insp. Rogelio Bungabong, nga nadawat nila ang alarma alas 11:30 sa buntag ug nakontolar nila kini sulod sa 16 minutos.
Matud ni Bungabong ang sunog nagsugod sa ikaduhang andana sa panimalay ni Felix Laborte ug dali kining mikatap sa laing kabalayan.
Ang mga silingan ni Laborte miasoy nga kalit na lang ilang nakita ang baga nga aso gikan sa taas nga bahin sa maong balay ug dali silang nitawag og tabang sa kabomberohan.
Giingong walay linya sa kuryenti ang balay butang nga gikahibulong sa tag-iya mismo.
Matud ni Laborte nga kalit kaayo ang panghitabo ug wala usab siya masayod kun nganong mikayo nga wala man sila’y nadungog nga adunay mibuto.
Sa pagkuha niining balita, padayon pa ang gihimo nga imbestigasyon sa kabomberohan kung unsa gyud ang hinungdan sa maong sunog.
Samtang giangkon ni Bungabong nga naglisod gyud sila sa pagsulod sa lugar tungod sa kahagip-ot sa dalan diin usa ra ka firetruck ang makaagi.
Ilang gihimo mao na lang ang engine relay aron mapawong og dali ang kayo.
Gumikan sa grabeng kainit sa panahon, gipahimangnoan sa kabomberohan ang katawhan nga magmabinantayon kanunay ug di usab angay mokompiyansa. (BANAT NEWS)
- Latest
