25 ka ASG patay sa Patikul

CEBU, Philippines - Misaka na ngadto sa 26 ka tawo ang nakalas sa engkwentro tali sa militar ug mga teroristang Abu Sayyaf human makuha sa mga Marines ang ilang training camp sa Patikul, Sulu.

Matud pa ni Capt. Maria Rowena Muyuela, ang tigpamaba sa Marines sa maong dapit nakadawat sila og impormasyon gikan sa field nga 25 na ka sakop sa Abu Sayyaf ang nakalas, matud pa sa report sa Philstar.com.

Duna say usa ka sakop sa Philippine Marines ang nakalas ug 24 ang angol sa maong panagsakbang.

Niadtong Miyerkules gisuwayan pagbalik sa ASG nga ilogon pagbalik ang maong kampo apan gipaulanan sila og bala sa gunships sa Philippine Air Force ug Navy ingon man artillery sa Marines hinungdan sa ilang pag-atras.

Sumala pa ni Muyuela nga ang maong training camp maayong pagkatago ilawom sa kakahoyan sa kabukiran sa Patikul. Dugang pa niya nga ang maong kampo dunay mga 50 ka payag nga gigamit sa mga terorista sa pagbansay sa bag-ong recruits.

Ang Abu Sayyaf nalakip sa listahan sa Estados Unidos isip usa ka terorista nga grupo ug kaalyado sa al-Qaida ug Jemaah Islamiyah. (BANAT NEWS)