‘Surambaw’ sa bulangan gidakop

CEBU, Philippines - Gipasakaan og kaso sa kapolisan ang tulo ka dayo nga mananari nga gikatahapan nga “manurambaw” sa bulangan human sila ireklamo sa mga sugarol sa Gallera Cockpit Arena sa Barangay Tabok, Dakbayan sa Mandaue alas-5 pasado sa hapon niadtong miaging adlaw.

Ang tulo ka dinakpan nga gipasakaan og kaso mao sila si Arnel Arango, 45, taga Barangay Villanueva, Misamis Oriental, Noel Dagaas, 53, taga Barangay Ilag, Lungsod sa Liloan, Southern Leyte ug Roel  Danao, 43, taga Purok 12, Barangay Baloy, Cagayan De Oro City ug pulos temporaryo nga nagpuyo sa dalan Plaridel, Dakbayan sa Sugbo. Si PO2 Ritchard Ares sa kapolisan sa Presinto 3 sa Mandaue City Police Office  (MCPO) miingon nga ang ilang kauban nga sila si PO3 Carlos Zapanta ug PO1 Christopher  Bongo maoy nakatubag sa alarma sa pagpangayo og police assistance sa caretaker sa maong bulangan.

Ang tulo giingong namatikdan sa mga sugarol nga tuyo nga mamiang sa mga manok diha sa taparanan matag ilang hikapon.

Dihang girekisa ang tulo, nasakpan silang pulos sila nagluklok og  mga Batangas Knife  ug tagsa ka paketeng gidudahang shabu.

Ang kaso kalapasan sa Batas Pambansa Bilang 6  ug pagdala og shabu ubos sa Republic Act 9165 o Comprehensive Dangerous Drug Act of 2002. (BANAT NEWS)