Ginang gitulis sa tulo ka tulisan

CEBU, Philippines -  Mikabat sa P25 mil ang kantidad sa kwarta ug cellphone nga nadala sa tulo ka wala mailhing tulisan nga mitulis sa usa ka ginang sa milabay’ng adlaw diha sa Barangay Luray Dos, dakbayan sa Toledo. Ang biktima giila nga si Jean Cabello, 40, nagpuyo sa Trocio St. sa nahisgutang barangay. Dali siya nga mi-report sa kapolisan sa maong hitabo.

Matud nila ni PO3 Roxam Enerio ug PO1 Emmanuel Arason sa Toledo City Police Station  nga  ang biktima sakay og traysikol gikan sa ilang balay paingon  unta  sa usa ka construction company sa Toledo.

Pag-abot nila sa kilid nga bahin sa North City Central School kalit nga mitungha ang tulo ka tulisan nga sakay sa usa ka kolor pula nga motorsiklo ug gitulis ang biktima.

Nadala sa mga tulisan ang P10 mil nga kwarta niini ug i-Phone 4S nga nagkantidad og P15 mil.

Ang kapolisan sa siyudad nagpahigayon og follow-up operation sa maong hitabo.  (BANAT NEWS)