Balay naigo og saag nga bala sa armas

CEBU, Philippines - Usa ka balay didto sa Sitio San Roque, Barangay Looc, dakbayan sa Mandaue nabuslot ang atop nga naigo sa saag nga bala sa kalibre 45 nga armas apan swerte kay wala’y naigo sa tagbalay kaniadto’ng Domingo sa gabii.

Si PO1 Pasaylo Bandolon, sakop sa Presinto 1 sa Mandaue City Police Office (MCPO), nga maoy nakatubag sa maong alarma miingon nga ang panimalay gipanag-iya ni Adones Delantar.

Ang asawa ni Delantar nga si Melanie maoy una nga nakamatikod sa kalit nga paghagtok sa atop sa ilang panimalay ug adunay mitugpa sulod sa ilang lawak. Nakita ni Melanie nga usa ka slug sa bala ang milapos sa ilang atop. Wala makadungog ang magtiayon nga adunay  nagpabuto og armas sa ilang mga silingan.

Gituohan nga ang nagpabuto og armas didto ra sa layo ug ang bala didto lang matagak sa balay sa mga Delantar.

Samtang nawad-an og mahalon butang ang usa ka panimalay sa Barangay Pagsabungan, dakbayan sa Mandaue nga gilungkab ang pultahan sa  wala hiilhing mga kawatan.

Ang panimalay nga gilungkab gipanag-iya ni Darlin Dayao, 34, minyo. Walay tawo sa balay sa mga Dayao mao nga ang mga kawatan nakahigayon pagpangawat.

Nakawat ang usa ka iPAD nga nagkantidad og P45 mil ug Laptop nga P35 mil. (BANAT NEWS)