Usa ang patay atol sa Rampada, apan LCPO nangangkong malinawon kini

CEBU, Philippines - Gihulagway ni Lapu-Lapu City OIC Police Office Director Police Senior Superintendent Armando Radoc nga malinawon ang pagpahigayon sa Rampada ning tuiga kun itandi sa milabay’ng tuig.  Matud pa ni Radoc mas midaghan ang misalmot sa Street Party karong tuiga nga miabot og 550 mil ka tawo kun itandi sa milabay’ng tuig nga 400 mil ang crowd estimate.

Gikalipay usab ni Radoc nga hapsay ug malinawon ang maong kalingawan kay walay mga dagkong krimen nga nakabalda sa tulo ka gabii nga kalingawan.

Mapasalamaton si Radoc sa mga miabag sa pagbantay sa kahapsay ug kalinaw  sa kalihukan sa siyudad nga gilangkoban sa mga sakop sa Barangay Public Safety Office o BPSO, BPATS ug mga sakop sa militar, Philippine Coast Guard ug Maritime Police.

Kasagaran sa alarma nga nasugatan mao ang mga kaso sa mga hubog nga nagmaoy apan walay mga nasamdan sa maong kalihukan.  Wala usab taho nga dunay nabiktima sa snatching ug pagpanguot sud sa event area. Samtang way kalambigitan sa maong selebrasyon ang napalgang patay nga si Jason Basas, 20, human sa Rampada Street Party kagahapon sa buntag.

Matud pa nga may kainom ang biktima nga sila si Sandro Piscalla, 27, Roy Piscalla, 23, ug Jaymon Gesolga, 22, nianang gabii apan nagkainitay sa ilang komedyahay nga miresulta sa pagdunggab kang Basas.

Mitahan hinuon ang usa sa mga suspek nga si Sandro Piscalla ngadto ni Pajo Brgy. Kapitan Junard "Ahong" Chan. Nasuta sa imbestigasyon nga may warrant of arrest sa kasong murder si Sandro. (BANAT NEWS)