Kapolisan naalarma sa pagkatap sa fake money

CEBU, Philippines - Human nga nasikop sa Carbon Police Station ang usa ka suspetsado nga nagpalusot og peke nga kwarta, gitan-aw karon sa kapulisan ang posibilidad nga usa ka grupo ang naglihok pagpakatap niini.

Matud pa ni Police Chief Inspector Romeo Santander ang hepe sa Criminal Investigation Branch CIB sa CCPO, ila karong gisubay ang record sa mga kanhi nasikop kaniadto. Sumala pa ni Santander posibleng nibalik na pud kini og lihok dinhi sa dakbayan sa Sugbo apan mibalhin na og safehouse.

“Base sa nakuha nga report naa pa gyuy remnants wala pa gyud nahurot, nibalik na pud daw. So hoping for the positive result, ato lang hinayhinayan para matultolan nato,” matud pa ni Santander.

Aduna sab silay gi-monitor karon nga mga barangay dinhi sa Sugbo ug silingang mga lugar nga posibleng nagtago ang mga grupo. Niadtong Sabado sa buntag, nasikop ang usa ka Alan Cabrera, human kini nasakpan nga misulay unta pagpayuhot og peke nga usa ka libo ka pesos ug nakuhaan pa kini og lain pang 6 ka libo nga peke nga mga kwarta.

Samtang ang Provincial Intelligence Branch pinangulohan ni Supt. Rodolfo Albotra mibutyag nga duna silay personalidad nga gipanid-an nga tighimo og pekeng kwarta. Dugang ni Albotra nga ang maong tawo migawas kini sa ilang gipahigayon nga kanhi operasyon apan ila una kini nga i-review kung ang maong tawo nagpadayon pa ba gihapon sa pagpamuhat og pekeng kwarta. (BANAT NEWS)