Tulo patay sa aksidente
CEBU, Philippines - Tulo ang patay sa managlahing mga aksidente sa kadalanan dinhi sa lalawigan ug sa siyudad sa Sugbo.
Patay ang usa ka babaye nga nabanggaan atol sa nahitabong karambola sa tulo ka sakyanan sa dalan Escario barangay Kamputhaw ning dakbayan sa Sugbo.
Giila ang biktima nga si Virgilia Ocampo, 56, nagpuyo sa Purok 4, Kamputhaw ning dakbayan.
Si PO2 Chady Jawel Jungoy miingon nga nagkadinumbolay ang tulo ka sakyanan, ang usa niini mao ang Honda Sedan nga gimaneho ni Condrada Lim ,76, ikaduha ang Toyota SUV nga gimaneho ni Eddie Binegay, ug ang usa ka multicab nga gimaniho sa usa ka Ranjet Vabor.
Sumala pa nga nawad-an og kontrol si Lim ug nabanggaan ang SUV ni Binegay ug multicab ni Vabor dayon nalahos kini sa poste sa kuryente.
Apan atol sa pagkawala sa maong karambola naigo diay ni Lim ang biktima diha kilid sa dalan. Patay na kini pag-abot sa tambalanan.
Samtang patay usab si Vengie Libato, 16, taga Barangay Salagmaya human mibangga ang gisakyan niini nga motorsiklo sa kongkretong poste sa kuryente sa barangay road sa Barangay Candabong, Alcantara. Paingon na unta mopauli sakay sa habal-habal nga gimaneho ni Bernard Diaz, 56, ang biktima dihang nahitabo ang aksidente.
Matud ni PO3 Ludiveco Odever nga mi-overtake si Diaz sa laing motorsiklo sa kurbadahong dalan apan nasampak sila sa poste.
Ang duha nakaangkon og samad sa lawas apan si Libato gideklarar kini nga dead on arrival sa Badian District Hospital.
Pipila ka oras ang milabay, usa ka motorsiklo nga nag-overloading ang nadisgrasya kay matud pa nakainom ang drayber niini diha sa national highway sa Barangay Tapon sa Dumanjug. Ang mga biktima nga sila si Marcelino Vibar, Edgar Jonggoy, ug Jerry Jonggoy, pulos taga Barangay Pawa nakaangkon og samad sa lawas ug daling gidala sa Barili District Hospital apan si Jerry gideklarar kini nga patay paglabay sa pipila ka minutos.
Sa imbestigasyon ni SPO2 Florencio Clareon, sa Dumanjug Police Station, nga ang mga biktima paingon sa Barangay Poblacion sa pagkahitabo sa disgrasya. (BANAT NEWS)
- Latest
