Kataposang pasahero pangitaon gyud

CEBU, Philippines - Di gyud mohunong ang Department of Health sa pagpangita niadtong usa ka tawo nga wala pa makuhai og swab test sa Middle East Respiratory Syndrome Corona Virus (Mers-CoV).

Ang pangulo sa DOH-7, Dr. Jaime Bernadas miingon nga sa 25 sa mga gikuhaan  nila og swab test nagnegatibo sa maong virus.

Kahinumduman nga duha ang na-report nga missing apan ning bag-o lang ilang natultulan ang usa ug anaa na kini karon sa isolation room sa Vicente Sotto Memorial Medical Center ug gipaabot na lang ang mamahimong resulta sa iyang eksaminasyon.

Nanghinaot ang DOH-7  nga ning bag-o nilang nakuha nga address mao na  kini ang ilang gipangita. Hinoon gipasalig sa DOH-7 nga Mers-CoV free gihapon ang Pilipinas.

Hugot gihapon ang gihimong pagbantay sa ahensiya ilabi na sa Bureau of Quarantine ug ubang departamento  dungan sa pag-awhag sa publiko nga magmabinantayon  ug sa pagtuman sa proper hygiene.

Samtang  gawas sa 26 nga nakuhaan og swab test sa DOH,  adunay lima nga gikan sa Middle East ang boluntaryong miadto sa ahensiya ug nagpatan-aw aron pagsiguro nga sila negatibo sa maong virus. (BANAT NEWS)