Opisina sa janitorial service gilungkab

CEBU, Philippines - Kapin sa P80 mil nga balor sa mga gamit ang nasakiyo sa kawatan nga milungkab sa opisina sa usa ka establisamento sa miaging kaadlawon sa barangay Zapatera sa dakbayan sa Sugbo.

Ang gilungkab mao ang opisina sa CW Clean Way General Services nga girepresentahan sa general manager  nga si Donald Poligrates, 40.

Base sa imbestigasyon sa kapolisan, usa ka Niño Dungog ang nakakita og usa ka lalaki nga misulod sa maong buhatan pinaagi sa pagtangtang sa air conditioning unit sa maong tindahan.

Diha sa bintana nga gibutangan sa aircon misulod ang maong lalaki sa maong buhatan.

Sa imbestigasyon sa kapolisan, nahanaw na ang duha ka laptops nga mobalor og P48 mil, usa ka camera nga mobalor og P30 mil, video camera nga mobalor og P8 mil, ug salapi nga P500. (BANAT NEWS)