Wanted sa Carcar nadakpan

CEBU, Philippines - Giila nga most wanted person sa syudad sa Carcar nasikop sa kapulisan, kaniadtong Sabado, sa alas-8 sa gabii.

Ang gidakop nailhan nga si Lemtors Estomago,  nagpuyo sa Sitio Lumboy, Barangay Liburon, dakbayan sa Carcar, pinasikad sa warrant of arrest nga gi-isyu ni RTC Judge Alexander Acosta  sa kasong kalapasan sa  Comprehensive Firearms Law.

Gisikop ang maong suspek sa Sitio Dapdap, Barangay Poblacion 3, nga giingon nga dugay nang gipangita sa balaod. Sa pakighinabi sa Banat News ni PO3 Emmanuel Blones sa Carcar police nahibaw-an nga ang operasyon gipangulohan ni Police Chief Inspector Teodulfo Manatad.

Atol sa operasyon wala nakaipsot ang suspek ug nakuhaan pa kini og usa ka fragmentation grenade sa iyang posisyon. Ang suspek natanggong karon sa Carcar PNP ug pasakaan og laing kaso ugma   may kalabotan sa paghupot og explosibo . (BANAT NEWS)